মাননীয়
প্রধান উপদেষ্টা ইউনুস চাচা,
আসসালামু আলাইকুম
চিঠির পয়লা সিলট’র শেষ সীমার জকিগঞ্জ উপজেলার গাউ-গেরামর লাখ লাখ হতভাগা, আউয়া-জাউয়া অবহেলিত জনগণর পক্ষ থাকি আমি বেহায়া, বেইজ্জত, জনম দুঃখী, কপাল পুড়া, আদুম-ছুদুম জকিগঞ্জী চাচার সালাম ও শুভেচ্ছা নিবায়।
পরসমাচার চাচা,
আইজ বড় একটা দুঃখ কইতাম করি এই চিঠিটা লেখিয়ার। আপনার জানার কথা নায়, আমরার জকিগঞ্জ বাংলাদেশ’র শেষ সীমায় আর সিলেট জেলা থাকি একশো কিলোমিটার দুরই। এই উপজেলা কত যে অবহেলিত তা চোঁখে না দেখলে বুঝার উপায় নাই।
চাচা বেটা,
আমরার ভালা কোন চলাচলর রাস্তা নাই। সিলেট-জকিগঞ্জ মেইন রাস্তা কিছু ভালা অইলেও শেওলা-জকিগঞ্জ রাস্তাবায় গেলে মানুষর হাড্ডি ভাঙ্গি যায়। বেটিনতর পেটো বাচ্চা থাকলে রাস্তায় জন্ম অইযায়। শিক্ষা আর চিকিৎসার তো অবস্থা কইলে কয়দিন খালি লেখতে অইবো। শিক্ষা আর চিকিৎসার কত যে দূর অবস্থা তা কইয়া শেষ করা সম্ভব নায়। এখনকুর উঠতি বয়সি ফুয়াইন আর ফুড়িনতর চাকরির কোন ব্যবস্থা নাই। হুনলাম জকিগঞ্জ একটা গ্যাস ফিল্ড অইবো, ইকটা নিয়াও হুনিয়ার টানাটানি শুরু অইগেছে। জকিগঞ্জর গ্যাস বুলে অন্য জাগাত নিয়া তোলা অইতো। জকিগঞ্জ বুলে গ্যাস স্টেশন করা অইতো নায়! অখানতা অইলে কিবা আমরার এলাকার কিছু ফুয়া-ফুড়িন্তে চাকরি পাইলা অনে। ইতা বাদ দিলাম, আরেখান হুনি-জকিগঞ্জ থাকি গ্যাস তুলিয়া বুলে জকিগঞ্জ না দিয়া অন্যবায় দিতায়? ইতা রেবা চাচা কিজাতর মাত হুনি। অন্যদিন ইতা লইয়া এখান চিঠি দিমু। ইবার খুব দরকারী একটা বিষয় তোমারে জানাইমু।
চাচা বো,
আইজ কইতাম চাইয়ার, কোন যুদ্ধ সংগ্রাম ছাড়া বাংলাদেশ যে ইন্ডিয়া লইয়া যারগি এর কোন খবর রাখরায় নি? হাসিনা বুয়াই তো গত ১৬ বছর ইতার খবর রাখা দূরর কথা, উল্টা হুনলে তাইন খুশ আছলা। কারণ, তান গেছে বাংলাদেশ থাকি ইন্ডিয়া আরও আপন আছিল। এখন আপনার ইলা কোন খাতিরানা ইন্ডিয়ার লগে তলে তলে আছেনি। তাকলে আমার পাল্টা এখান চিঠি দিয়া খলে খলে জানাইবায়। আর যদি ইলা কুন্তা ইন্ডিয়ার লগে না থাকে, তাইলে আর দেরী না করিয়া দেশর মানচিত্র রক্ষার চেষ্টা করবায়।
ও চাচা,
তুমি হুনলে অবাক অইবায়, বাংলাদেশ’র সিলেট জেলা’র জকিগঞ্জ উপজেলা কুশিয়ারা নদী আস্তে আস্তে ভাঙ্গিয়া ইন্ডিয়ায় লইয়া যারগি। কুশিয়ারা নদী আন্তর্জাতিক সীমান্ত নদী অওয়ায়, বাংলাদেশ থাকি যা ভাঙ্গে তা ইন্ডিয়ার অইযায়। বাংলাদেশ স্বাধীন অওয়ার পর থাকি প্রত্যেক বছর ওলা তোড়া তোড়া ভাঙ্গি ভাঙ্গি এখন কয়েক হাজার একর হুনিয়ার ইন্ডিয়ার পেটও। এরলাগিরে চাচা এখন যদি ব্যবস্থা না নেও, তবে একদিন হুনবায় জকিগঞ্জ নামে বাংলাদেশে কোন উপজেলা নাই।
চাচা রেবা,
আইজ চিঠি বেশ লাম্বা করতাম নায়। আমরা জকিগঞ্জর আউয়া ছুদুম মানুষ’র একটা আবদার, আমরার দেশর মানচিত্র জলদি রক্ষা করো। যত দেরী করবায় অত বেশী জায়গা ইন্ডিয়ারে দিবায়। আর ইন্ডিয়া কোন যুদ্ধ সংগ্রাম ছাড়া জায়গা পাইয়া মুরি মুরি হাসিবো আর খইবো ফগার বাংলাদেশ।
শিয়ান চাচা,
জানি এই চিঠিটা তোমার সামনে যাইতো নায়। যদি কোন মাধ্যমে এই চিঠি তোমার কাছে যায় আর কেউ বিষয়টা বুঝাইয়া খয়, তাইলে আপনে আপনার দয়ার নজর দিয়া আমরার জকিগঞ্জটারে রক্ষা করবায়।
ইতি
আপনার আদুম-ছুদুম
জকিগঞ্জী চাচা