মাননীয়
প্রধান উপদেষ্টা ইউনুস চাচা,
আসসালামু আলাইকুম
চিঠির পয়লা সিলট’র শেষ সীমার জকিগঞ্জ উপজেলার গাউ-গেরামর লাখ লাখ হতভাগা, আউয়া-জাউয়া অবহেলিত জনগণর পক্ষ থাকি আমি বেহায়া, বেইজ্জত, জনম দুঃখী, কপাল পুড়া, আদুম-ছুদুম জকিগঞ্জী চাচার সালাম ও শুভেচ্ছা নিবায়।
পরসমাচার চাচা,
আপনে অন্তর্বর্তী সরকারর প্রধান উপদেষ্টা হওয়ার এক বছর অইগেল! অথচ এই সময়ের ভিতরে আপনে আমরা জকিগঞ্জবাসীরে কি জিনিসটা দিলা। আমরা আপনার কাছ থাকি কিতা পাইলাম? নদী ভাঙন যেলা আছিল ওলা রইল, রাস্তা-ঘাট যেলা আছিল এরচেয়ে খারাপ অইছে, আইন শৃঙ্খলা আগে থাকি খারাপ অইছে, উপজেলা প্রশাসন, পুলিশ বাহিনী ও চিকিৎসক সংকট এখন চরম আকার ধারণ করছে।
চাচা জি,
বাংলাদেশর শেষ সীমানার এক কোণার এই জকিগঞ্জ উপজেলা আপনার নজরের বাহিরে আছিল মনে ওর। আপনার একটা বছরে কোন পরিবর্তন আমরা দেখলাম না। শুধু দেখলাম অফিসার অখল পরিবর্তন করিয়া চেয়ার খালি রাখা। ইতা লইয়া সাংবাদিক অখলে লেখলেও আপনার চোঁখে পড়েনা দেখি। এসিল্যান্ডের মতো গুরুত্বপূর্ণ পদ আজ চার মাস থাকি খালি! এর কারণে মানুষর কি পরিমাণ কষ্ট করের তা কিচ্ছু বুঝরানা মনে হয়। শুধু এসিল্যান্ড নায়, আইজ কয় মাস থাকি জকিগঞ্জ সাবরেজিষ্ট্রার নাই। ৬/৭ মাস অতিরিক্ত পুলিশ সুপার জকিগঞ্জ সার্কেল পদ খালি থাকলেও হুনছি নয়া একজন আইছওইন। তাইন আইলেও সাংবাদিক অখলে ফোন দিয়াও তানরে পাইরা না। তাইন যে কিতা ব্যস্ত আল্লায় জানেন।
ও চাচা,
আমরার আসলে খুব শরম করের। আপনে যখন সরকারের দায়িত্ব নিছলা, ই-সময় আমরা বড় বড় গফ করছি। কইছি ইবার বাংলাদেশে বাবায় লাগাল পাইছে। মনে মনে কইছি ইবার আপনি একটা চমক দেখাইবা। মনে করছিলাম, আইনশৃংখলা উন্নয়ন, যোগাযোগ, শিক্ষা, চিকিৎসা সহ সব ধরণের উন্নয়নে ইবার পরিবর্তন অইবো। কিন্তু রেবা চাচা, আপনে গত একটা বছরে যেতা দেখাইলা ইতার লাগি আমরা এখন সমাজর কাছে মুখ দেখানি মুশকিল অইযার। খুব শরম পাইয়ার। বিশেষ করি আমরার জকিগঞ্জ’র এই খারাপ অবস্থার লাগি মানুষর সামনে গিয়া মাততে এখন ভয় লাগে। যে অবস্থা আখতা কিগুয়ে কিতা কইয়া শরম দিলাইবো।
চাচা রেবো,
হুনিয়ার নির্বাচন দিলাইরায়। দেউ কোন অসুবিধা নাই। তবে আপনে চেয়ার থাকি নামার পরে জকিগঞ্জের মানুষ আপনারে মনে করার মতো কুচ্ছু পাইতো নায়। আমরার পরের হুরুতা মরুতায় ইউনুস চাচা কে আছলা কইতাউ পারতা নায়। তবে হ্যাঁ- শিক্ষিত হরুতা অখলে গুগলো সার্চ দিলে তোমারে তুকাইয়া পাইতা পারওইন। কিন্তু এলাকার কোন উন্নয়ন দেখিয়া কইতা নায় এই কামটা ইউনুস চাচার সময় অইছে।
আমার আশা চাচা,
আপনি আগামী নির্বাচনের আগে সিলেটর এই শেষ সীমানার জকিগঞ্জে মানুষের লাগি কিছু একটা করিয়া যাউ। নাইলে মানুষ সারা জীবন গাইলাইবো। কইবো একটা পয়সার কোন কাম কাজ করাইছো না। আমি অনুরোধ করি কইয়ার চাচা, আপনি দয়া করি জকিগঞ্জর রাস্তা-ঘাট, নদী ভাঙন আর হাসপাতালর একটা ব্যবস্থা করি যাউক্কা। এই কাম সরকারর লাগি সামান্য অইলেও আমরার লাগি পাহাড় সমান। আশা করি চাচা, আপনি এই কাজগুলো জকিগঞ্জের হতভাগা আউয়া জাউয়া মানুষর লাগি করিয়া যাইবা।

ইতি
আপনার আদুম-ছুদুম
জকিগঞ্জী চাচা