মাননীয়
প্রধান উপদেষ্টা ইউনুস চাচা,
আসসালামু আলাইকুম
চিঠির পয়লা সিলট’র শেষ সীমার জকিগঞ্জ উপজেলার গাউ-গেরামর লাখ লাখ হতভাগা, আউয়া-জাউয়া অবহেলিত জনগণর পক্ষ থাকি আমি বেহায়া, বেইজ্জত, জনম দুঃখী, কপাল পুড়া, আদুম-ছুদুম জকিগঞ্জী চাচার সালাম ও শুভেচ্ছা নিবায়।
পরসমাচার চাচা,
আপনে কিতা দেশর প্রাইমারী স্কুল অখলর খবরা খবর রাখরা নি? আমরা গরীব গোরা মানুষর স্কুল নু প্রাইমারী স্কুল। দিন দিন নু চাচা ইতা স্কুল অখলর বারোটা বাজি যার।
ওহ চাচা স্যরি, আপনি তো ইতা দেখার সময় নাই। আপনে দেশর সংস্কার লইয়া খুব ব্যস্ত! নির্বাচন লইয়া ব্যস্ত! আরো কত গুরুত্বপূর্ণ বিষয় অখল লইয়া ব্যস্ত! ইতা দেখার আপনার বা আপনার সরকারর সময় তো থাকার কথা না। তারপরেও কিছু না কইলে আমার মতো গরীবর মন ফাতলা অইতো নায়।
ও চাচা,
আপনে বুঝরা না। দেশর বারোটা বাজি যার। গরীব গোরার সরকারি প্রাইমারী স্কুল অখলর এখন বেহাল দশা। আমরার জকিগঞ্জ’র বেশীরভাগ স্কুল অখলর এখনো ঠিক মতো মাস্টার নাই, হেড মাস্টর নাই বেশ কয়েকটা স্কুলে। এরলাগি পড়া শোনার মানও দিন দিন তলানিত যার গি। পড়া-লেখার ইতা হাল দেখিয়া ধনী অখলে তারার বাচ্চারে লইয়া প্রাইভেট বা কেজি স্কুল অখলো নিয়া ভর্তি করিয়া পড়াইরা। আর আমার লাখাইন গরীব গোরা আদুম ছুদুম অখলে প্রাইমারীত বাচ্চাইন দিয়া তই রাখছে।
চাচা রেবো,
আপনে কউক্কা চাই, আমরা গরীব অখলর বাচ্চাইন্তে কিতা পড়া-লেখা করতা নানি? এরা কিতা গরীবর হরুতা অয়ায় ভবিষ্যতে কিতা মানুষ অইতা নানি? আপনে কিতা চাইন নানি, আমরার হরুতা অখলে একটু ভালা করি পড়িতা? যদি আপনে চাইন, তাইলে আমরার বায় আপনি একটু নজর দেউক্কা। নাইলে হারছে বারোটা বাজিয়া।
চাচাজি,
আপনার দরবারে জোড় আতে আরজ, আপনি যত জলদি সম্ভব আমরার প্রাইমারী স্কুল অখলো দরকার মতো মাস্টর অখল দেও। বিশেষ করি হেড মাস্টার না দিলে স্কুলাইন্তর কোন পড়া লেখার সিস্টেম আইতো নায়। মাস্টর অখল আওয়া যাওয়ার কোন নিয়ম নীতি তাখতো নায়। আর ইতা ঠিক না থাকলে বাচ্চা অখলর পড়া-শোনা অইতো নায়।
চাচা বো,
আমরার আরজ, আপনে যত তাড়াতাড়ি পারবা অত তাড়াতাড়ি আমরার প্রাইমারী স্কুল অখলর ইতা সমস্যা দূর করি দেউক্কা। এই কামটা করি দিতে পারলে আমরার লাখাইন গরীব গোরা অখলর দোয়া পাইবা। আপনার সিদ্ধান্তর অপেক্ষায় রইলাম চাচা।

ইতি
আপনার আদুম-ছুদুম
জকিগঞ্জী চাচা