মাননীয়
প্রধান উপদেষ্টা ইউনুস চাচা,
আসসালামু আলাইকুম
চিঠির পয়লা সিলট’র শেষ সীমার জকিগঞ্জ উপজেলার গাউ-গেরামর লাখ লাখ হতভাগা, আউয়া-জাউয়া অবহেলিত জনগণর পক্ষ থাকি আমি বেহায়া, বেইজ্জত, জনম দুঃখী, কপাল পুড়া, আদুম-ছুদুম জকিগঞ্জী চাচার সালাম ও শুভেচ্ছা নিবায়।
পরসমাচার চাচা,
আমরার জকিগঞ্জ’র একের পর এক সমস্যা আপনারে কইতে ওর। আপনে কইবা সিলেট জেলার জকিগঞ্জ উপজেলাত সমস্যা ছাড়া আর কুচ্ছু নাইনি। আমি কইমু চাচা, আমরার এই জকিগঞ্জ উপজেলাত সমস্যা ছাড়া যেগুলো আছে তা সমস্যার ভিতরে হামাই গেছে।
চাচা রেবা,
আমরার জকিগঞ্জ যদিও পাহাড় পর্বত বা পাথর পুতর নাই, তারপরেও যা আছে তা দেখার মতো। যেমন মনে করউক্কা জকিগঞ্জ কাস্টম ঘাট, তিন নদীর মোহনা, সাজিদ রাজার বাড়ি, শিতালং শাহ’র মাজার, ফুলতলী ছাহেবের মাজার সহ আরও কত কিছু। কিন্তু রেবা চাচা, সরকার আমরার এইসব সুন্দর জিনিস অখল দেখেনা। আইজ পর্যন্ত আমরার জকিগঞ্জ কাস্টম ঘাট করতে পারলোনা সরকার। আমলশীদর মতো একটি তিন নদীর মোহনায় গড়তে পারলোনা পর্যটন এলাকা!
চাচা গো,
আমরার দুঃখ কওয়ার কোন জায়গা নাই। কারে কইলে আমরার দুঃখ উসল অইবো। কউক্কা চাইন, জকিগঞ্জ কাস্টম ঘাটরে সুন্দর করি সাজানি অইলে ভারত-বাংলাদেশের এই সীমান্তবর্তী জায়গাটা কত যে সুন্দর অইলো ওনে। কত মানুষ যে ইকানো গিয়া সুন্দর সময় কাটাইলা ওনে। বিকাল ও সন্ধ্যায় এলাকার মানুষ গিয়া একটু শান্তির ছোঁয়া পাইলা ওনে। কিন্তু আইজ পর্যন্ত এ জায়গাটা যেলা আছিল ওলাউ আছে। অন্যদিকে ভারত থাকি নামিয়া আওয়া বরাক নদী আমলশী আইয়া সুরমা ও কুশিয়ারা নদী অইয়া বাংলাদেশে ঢুকছে। এই কথাটা হুনতে কত যে ভালা লাগের। আর দেখলে যে কত সুন্দর লাগবো তা তো কইয়া শেষ করার নায়। কিন্তু এত সুন্দর একটা জায়গা আইজ পর্যন্ত সরকারে পর্যটন এলাকা করতে পারলোনা!
হুন রেবা চাচা,
আপনে আমরার বায়দি একটু চাউক্কা। আমরা এত সুন্দর সুন্দর জায়গা অখল জকিগঞ্জ তইয়া মানুষরে বিনোদন দিতে পারিয়ার না। এর কারণ বাংলাদেশ সরকারে আমরারে দেখে না। আমরার কথা অখল সরকার পর্যন্ত যায় না। যার কারণে আমরা যেলা আছলাম অলাউ আছি।
ও চাচা,
আমরা রেবা আশা করি, আপনে আমরার খেয়াল নজর করবা। আপনে প্রধান উপদেষ্টা ওয়ার পরে মানুষে কততা আশা করছিলা। কিন্তু রেবা কুচ্ছু আইজ পর্যন্ত আপনে দিতে পারলানা। আমরা রেবা আশা করমু, আপনে যত জলদি পারেন আমরার জকিগঞ্জ কাস্টম ঘাট আর আমলশীদ তিন নদীর মোহনা খুব জলদি পর্যটন কেন্দ্র করবা।

ইতি
আপনার আদুম-ছুদুম
জকিগঞ্জী চাচা