মাননীয়
প্রধান উপদেষ্টা ইউনুস চাচা,
আসসালামু আলাইকুম
চিঠির পয়লা সিলট’র শেষ সীমার জকিগঞ্জ উপজেলার গাউ-গেরামর লাখ লাখ হতভাগা, আউয়া-জাউয়া অবহেলিত জনগণর পক্ষ থাকি আমি বেহায়া, বেইজ্জত, জনম দুঃখী, কপাল পুড়া, আদুম-ছুদুম জকিগঞ্জী চাচার সালাম ও শুভেচ্ছা নিবায়।
পরসমাচার চাচা,
আপনে দেশে আছলা কি না জানিনা। তবে নিশ্চয় আপনে জানওইন, ২০২০ সালর দিকে একবার আমরার দেশে করোনা আইছিল। এই সময়ে মানুষরে সতর্ক অইয়া চলার লাগি নানা কিছু সরকারে করছে। তখন বিভিন্ন শিক্ষা প্রতিষ্ঠান, অফিস আদালত, ব্যাংক বীমাসহ গুরুত্বপূর্ণ সব কিছু বন্ধ করি দেওয়া অইছিল। জনগণরে একলগে বেশী জমা অইতে সরকার বিভিন্ন বাহিনী বাঁধা দিতো। ইতা নিশ্চয় আপনে জানেন বা হুনছওইন। আপনারে ইতা নয়া করি হুনানি আমার মকছুদ নায়। আমি আপনারে গুরুত্বপূর্ণ একটা কথা কইতাম চাইয়ার।
চাচা জি,
বাংলাদেশে করোনা আওয়ার বাদে যখন স্কুল-মাদ্রাসা বন্ধ দেওয়া অইছিল। তখন বাচ্চারার পড়া-শোনার সুবিধার লাগি মোবাইলে পড়া দিতা মাস্টর অখলে। এরপর করোনা যতদিন আছিল, ততদিন এই মোবাইল দিয়া পড়া শোনা চললো। এরপরে যখন করোনা শেষ অইলো, তখন স্কুল-মাদ্রাসা খুললো। ছাত্র-ছাত্রী অখল নিজর স্কুল-মাদ্রাসায় যাওয়া শুরু করলা। কিন্তু চাচা মাস্টর অখলে হউ মোবাইলে পড়া দেওয়া বাদ দিলানা। তারা হউ আগর লাখাইন মোবাইলে বাচ্চারারে পড়া দিরা। এইটা আবার কোন ধরণের কায়কায়বার চাচা?
কিতা কইতাম চাচা,
আপনে হুনলে অবাক অইবা। এখন এই মোবাইলে বাচ্চার জীবন নষ্ট করি ফালার। বাচ্চারা পড়া দেখতাম কইয়া মোবাইল নিয়া এখন যা ইচ্ছা তা করের। অন্য ফুয়াইনতর লগে ল্যাং মারের। এখন ইতা সামাল দেওয়ার উপায় নাই চাচা! সেভেন, এইট ও নাইনর ছাত্র-ছাত্রী অখলে এখন যেতা কারবার ঘটাইরা ইতা হুনলে মাথা নষ্ট অইযায়। কোন অবস্থায় এখন আর ইতা সামাল দেয়া যার না। আর এইসব একমাত্র মাস্টর অখলর কারণে অর। তারা এই মোবাইলে পড়া দেওয়ায় বাচ্চা অখলর হাতে মোবাইল দেওয়ার লাগে। আর মোবাইল দিয়া তো সব সময় বাচ্চা অখলর কান্দাত উবানিও যায় না। নিজর নিজর কত কাম কাজ থাকে। আর অনেক মা-বাপে মোবাইলর আগা গোড়া বুঝেও না।
এরলাগি চাচা,
আপনার দুকান পাওয়ে ধরিয়া কইয়ার দেশর স্কুল-মাদ্রাসা থাকি মোবাইলে পড়া দেওয়া বন্ধ করওউক্কা। নাইলে সব সর্বনাশ অইযার। শহর নায় এখন গ্রামে ভাগিয়া যাওয়া ও ন্যাংটা ছবি দেওয়া থাকি শুরু করি সব খারাপ কাম এখন হরুতায় কররা। ইতা শুধু মোবাইলের কারণে। আর এই মোবাইল আমরা বাধ্য অইয়া দেই শুধু পড়ার কারণে। কিন্তু শেষ পর্যন্ত দেখা যায়, বাচ্চা অখলে পড়া তইয়া আমরারে ছড়া শুরু করি দেইন।
চাচা রেবো,
আমরাও তো এক সময় পড়িলাম। কিন্তু ইতা মোবাইল টুবাইল তো আর লাগলো না। এখন এই কি কায় কায়বার শুরু করলা মাস্টর অখলে। দোয়াই আল্লাহ’র চাচা, আমরারে ইতা শয়তানি পড়া থাকি মুক্তি দেও। পারলে আগর জমানাত আমরা যেলা পড়ছি ওলা ব্যবস্থা করি দেও।

ইতি
আপনার আদুম-ছুদুম
জকিগঞ্জী চাচা