মাননীয়
প্রধান উপদেষ্টা ইউনুস চাচা,
আসসালামু আলাইকুম
চিঠির পয়লা সিলট’র শেষ সীমার জকিগঞ্জ উপজেলার গাউ-গেরামর লাখ লাখ হতভাগা, আউয়া-জাউয়া অবহেলিত জনগণর পক্ষ থাকি আমি বেহায়া, বেইজ্জত, জনম দুঃখী, কপাল পুড়া, আদুম-ছুদুম জকিগঞ্জী চাচার সালাম ও শুভেচ্ছা নিবায়।
পরসমাচার চাচা,
জকিগঞ্জ’র আইন শৃঙ্খলা পরিস্থিতি সময় সময় খারাপ ওর। মারামারি, খুন-খারাবি, চুরি-ডাকাতি, বদমাশী থাকি শুরু করিয়া সব জাতর অপরাধ এখন জকিগঞ্জ ওর। ইতার কারণে ঠাণ্ডা টুন্ডা জকিগঞ্জ’র মানুষ এখন অনেকটা অশান্তির মাঝে দিন কাটাইরা।
হুন রেবা চাচা,
অউ আগস্ট মাসের পয়লা দু’দিনর মাথায় জকিগঞ্জ দুইটা লাশ পাওয়া গেল। এই দু’জনরে পরিকল্পনা করিয়া খুন করা অইছে করি এলাকাবাসী মনে কররা। এর আগে জকিগঞ্জ থাকি হারানির ১২দিন পরে ভারত থাকি এক জোয়ান বেটার লাশ উদ্ধার করা অইছে। এর কয়েক দিন আগে পাওনা টাকা লইয়া দরবার করিয়া আমরার বারহাল ইউনিয়নের সমসখানি গ্রামর সুহেল আহমদরে খুন করা অইছে। চুরি-ডাকাতি তো এখন হরহামেশা অইতে আছে। কয়েজনে মিলিয়া একটা স্কুলর ছাত্রীর লগে বদমাশীও করেছেন এই কিছুদিন আগে।
ও চাচা,
ইলা চললে দিন দিন জকিগঞ্জ খুব খারাপ অইযিব। এমনেউ মদ, ফেন্সিডিল, গাঞ্জা ইতার কারণে আমরা আগে থাকিউ বেইজ্জত অইয়া আছি। আমরা জকিগঞ্জ বর্ডার এলাকায় ওয়ায়, এইসব মদ ছদ বন্ধ করার উপায় নাই। বার বার মদ ছদের লাগি বাংলাদেশর মাঝে আমরা আলোচনাত থাকি। ইতা সমস্যা আইজ পর্যন্ত বন্ধ অর না। আর কোন দিন বন্ধ অইবো করি বুঝিয়ার না। আর এইসব কারণে আমরার মান সম্মান একেবারে প্লাস্টিক অইযার।
চাচা রেবো,
আমরা জানি আপনে দেশে শান্তি চাইন। কিন্তু গত এক বছরে আমরা তেমন একটা শান্তি পাইলাম না। মনে করছিলাম-আপনে সরকারে আওয়ার পরে ফখরুদ্দিন আর মঈন উদ্দিন চাচার থাকি শক্ত ব্যবস্থা নিবায়। কিন্তু আপনার এমন দায়সারা অবস্থা দেখিয়া এখন আফসোস লাগের আপনার মতো শান্তিতে নোবেল পাওয়া একজন মানুষ ছোট্ট একটা দেশের সবচেয়ে বড় পদে বইয়া শান্তি আনতে পারলানা।
আমার আশা চাচা,
আপনে পুলিশের সব খবরা খবর নিয়া, পুলিশের কোন দরকার থাকলে তা পুরন করিয়া দিবা। পুলিশরে কইবা ইতা অপরাধ বন্ধে তাঁরা শক্ত অবস্থান নিতা। কোন ঘটনা ঘটলে লগে লগে আসামি ধরার ব্যবস্থা করতা। তারা না পারলে পুলিশের অন্য টিম অখলরে কইতা। আর একেবারে না পারলে সেনাবাহিনী দিয়াও জকিগঞ্জটা শান্তি করবা। আসলে এইটা এখন আমরা হকল”র মনে চাওয়া আর মনের আশা।

ইতি
আপনার আদুম-ছুদুম
জকিগঞ্জী চাচা