মাননীয়
প্রধান উপদেষ্টা ইউনুস চাচা,
আসসালামু আলাইকুম
চিঠির পয়লা সিলট’র শেষ সীমার জকিগঞ্জ উপজেলার গাউ-গেরামর লাখ লাখ হতভাগা, আউয়া-জাউয়া অবহেলিত জনগণর পক্ষ থাকি আমি বেহায়া, বেইজ্জত, জনম দুঃখী, কপাল পুড়া, আদুম-ছুদুম জকিগঞ্জী চাচার সালাম ও শুভেচ্ছা নিবায়।
পরসমাচার চাচা,
গত সাপ্তাত আপনারে কইছিলাম এই সাপ্তাত জকিগঞ্জ’র রাস্তা ঘাট নিয়া চিঠি দিমু। অউ হিসাবে আইজ চিঠিখান আপনার কাছে লেখিয়ার। বারবার চিঠি লেখায় দয়া করি আপনে রাগ গোসা করবানা।
চাচা বেরা,
আমরার ইতা সমস্যা খওয়ার জায়গা নাই। এরলাগি বারবার আপনারে চিঠি দিয়া বিরক্ত করিয়ার। আপনার কাছে চিঠিখান দিলে কুচ্ছু না অইলেও জান খানো কিছু আরাম মিলে। মনে করি, কোন দিন হয়তো আপনে চিঠিখান দেখিয়া আমরার সমস্যা দূর করি দিলাইবায়। আসলে যে ইতা চিঠি তুমি জীবনে দেখতায় নায়, তা বুঝিয়ার রেবা চাচা।
ও চাচা,
আমরার জকিগঞ্জ উপজেলা অইলো সিলেট জেলা থাকি প্রায় একশো কিলোমিটার দূরে। আমরার উপজেলা বাদে বাংলাদেশর আর কোন জায়গা নাই। আমরা সাইটে খালি ইন্ডিয়া আর ইন্ডিয়া। কোন সুবিধা অসুবিধায় ইন্ডিয়া ছাড়া আমরার যাওয়ার জায়গা নাই। এরলাগি আমরা খুব নিরীহ ও অবহেলার জনগণ। আমরার এলাকার সমস্যা অখলবায় চাইলে মনে প্রশ্ন আয়, আমরা কোন দেশর বাসিন্দা? বাংলাদেশ সরকারর মানুষ নি আমরা। বাংলাদেশ’র মানুষ অইলে আমরা ইতা সমস্যা অখল তো বাংলাদেশ সরকারে দেখতো।
মায়ার চাচা,
আমরার জকিগঞ্জ’র এলজিইডি’র সব রাস্তা একেবারে ভাঙা। গাত গাড়ায় ভরা উপজেলা, ইউনিয়ন ও গ্রামর রাস্তা-ঘাট। কত বছর থাকি যে ইতা রাস্তার কাম কাজ ওরনা তার কোন হিসাব নাই। এরমাঝে ২০২২/২০২৪/২০২৫ সালর বন্যার পানিয়ে রাস্তা ঘাট একেবারে চলাচল করার অবস্থা রাখছেনা। উপজেলার অন্যতম প্রধান সড়ক শেওলা-জকিগঞ্জ, কালিগঞ্জ-জকিগঞ্জ থাকি শুরু করি ইউনিয়ন ও গ্রামের রাস্তা এখন একেবারে বরবাদ। ইতা রাস্তা বায় গাড়ি চলা তো দূরর কথা, ইতা রাস্তাবায় এখন মানুষর হাটা চলার উপায় নাই।
হায় রেবা চাচা,
কিতা কইতাম তুকাইয়া পাইয়ার না। আমরার ইতা রাস্তা ঠিক করার লাগি কত দৌড় আর কত মিছিল মিটিং করলাম এরপরেও আপনারার খেয়াল খান আয় না দেখি। আমরা কিতা বাংলাদেশর জনগণ নানি? আমরার হুরুতা মরুতা ইতা বাংলাদেশী নানি? ইতা যদি বাংলাদেশী অইন তে ইতা স্কুল মাদ্রাসাত যাইতে এত কষ্ট করার লাগে কেনে? আমরা মুরব্বী মানুষ চলাফিরা করতে রাস্তা ঘাটে অত কষ্ট করতে অয় কেনে? আমরার রোগী অখল ইতা রাস্তাবায় যাইতে বেমার বাড়ের কেনে?
ও চাচা,
আপনে আমরার ইতা প্রশ্নর উত্তর দিবা না এইসব রাস্তা ঘাট ঠিক করি দিবা তা কইলাউক্কা। আমরার আর সহ্যের বারা যারগি। রাস্তা ঘাটে চলতে ফিরতে যা কষ্ট অয় তা থাকি বন জঙ্গলে গিয়া থাকা ভালা। আপনার বা আপনার উপদেষ্টা অখলর ইবায়দি চোখটা পড়বোনি রেবা চাচা?
সোনা চাচা,
জানি এই চিঠিটা তোমার সামনে যাইতো নায়। যদি কোন মাধ্যমে এই চিঠি তোমার কাছে যায় আর কেউ বিষয়টা বুঝাইয়া খয়, তাইলে আপনে আপনার দয়ার নজর দিয়া আমরার গাউ গেরামর রাস্তা ঘাট খানাইন ঠিক ঠাক করিয়া গাউ-গেরামর লাখ লাখ হতভাগা, আউয়া-জাউয়া অবহেলিত জনগণর উপকারটা করবা।

ইতি
আপনার আদুম-ছুদুম
জকিগঞ্জী চাচা